SHPETIM LUKU/ Siguruesit, Bonus jo, Malus po!

 

Në fillim të këtij muaji hyri në fuqi ligji për sigurimin e detyrueshëm në sektorin e transportit. Ligji përmban disa risi të rëndësishme, mes të cilave edhe mundësinë e përdorimit të sistemit bonus-malus nga shoqëritë e sigurimit. Por nuk ka karakter detyrues për këto kompani, të cilat nëse do të dëshironin mund ta zbatonin sistemin bonus-malus edhe përpara këtij ligji. Pavarësisht se specialistët e fushës e ngrejnë në qiell këtë zhvillim, duket se në kushtet ku ndodhet tregu i sigurimeve në Shqipëri mungon vullneti prej kompanive për ta zbatuar atë. Ndonëse ajo është një pritshmëri e konsumatorit, pse jo, edhe një premtim i kompanive të sigurimit, të cilët jo pak herë i janë referuar këtij sistemi si një ndryshim i madh që do ndodhë.

Pavarësisht se disa mund ta konsiderojnë paragjykim  këtë që po them, janë disa arsye mbi të cilat mbështetet parashikimi im. Tregu i sigurimeve në Shqipëri ka vite që është “ngrirë”. Së pari sa i takon numrit të kompanive që operojnë në treg. Zyrtarisht janë 8 kompani që ushtrojnë aktivitetin në këtë sektor, por duke llogaritur që Eurosig dhe Insig kanë të njëjtin pronar, e po kështu edhe SIGMA dhe Interalbania janë pronë e Vienna Insurance Group, duket se numri real i kompanive është vetëm 6. Në një kohë që në Kosovë, që është një treg, pak më i vogël se Shqipëria, tregu i sigurimeve ka 15 kompani.

Së dyti, kompanitë shqiptarë e kanë likujduar mes vetes konkurëncën përsa i takon sigurimit të detyrueshëm, që është edhe krijuesi kryesor i buxhetit të kompanive siguruese. Prej disa vitesh kompanitë kanë caktuar dhe janë pajtuar me një hierarki të caktuar sa i takon këtij lloj sigurimi. Kjo hierarki është caktuar me qëllim që të eleminohet dukuria negative e shitjes së policave të sigurimit me cmime qesharake, sikundër ndodhte përpara  se të bëhej “marrëveshja”. Një policë sigurimi e asaj kohe arriti të shitej në cmime që nuk përballonin dot as shpenzimet operative të kompanive. Për pagim dëmesh as që bëhej fjalë, ndaj disa kompani ekspozoheshin qartë nëpërmjet këtij treguesi si subjekte që thjesht shisnin letra dhe aspak premtim dëmshpërblimi, sikurse është funksioni themelor i një kompanie sigurimi.

Duke përcaktuar në mënyrë konsensuale një tarifë police të sigurimit të detyrueshëm-18 mijë lekë- si dhe duke u pajtuar gjithsecila kompani me atë pjesë të tregut kur u bë ky përcaktim, situata duket se ka ndryshuar disi për mirë, por jo ashtu sikurse duhet. Dhe arsyeja se pse sërish tregu i sigurimeve nuk është ashtu sikurse duhet lidhet sërish me nivelin se ku ndodhet polica e sigurimit. “Shqiptarët me cmime të policave të sigurimit si në Afrikë duan dëmshpërblime si në Europë”-thotë Avni Ponari, drejtuesi i kompanisë SIGAL UNICA Group Austria dhe një prej personazheve më aktiv nga bota e sigurimeve. Vetë SIGAL, ka pak vite që e zbaton një lloj sistemi bonus-malus, duke i bashkangjitur policës së sigurimit të mjetit motorik edhe një policë sigurimi minikasko. Dhe që vetëm për 6-mujorin e parë të vitit 2021 i ka kushtuar kësaj kompanie rreth 400 milionë lekë nga dëmshpërblimet e përfituara nga ky lloj sigurimi.

Shkaku kryesor është pra niveli aktual i tarifës së policës së sigurimit motorrik, e pas tij edhe rehatia ku kanë rënë prej vitesh kompanitë e sigurimit.

E pse duhet të bëjnë një ndryshim të rëndësishëm, sikurse është sistemi Bonus-Malus, ndërkohë që Kosova psh e zbaton atë?!

E pse duhet ti hyjnë andrallave disa prej kompanive të sigurimit, të cilat raportin mes sigurimeve të detyrueshme dhe atyre vullnetare e kanë dukshëm në favor të të parit, ndërkohë që duket se janë në rregull me llogaritë aktuale?

E pse duhet të riskojnë disa kompani sigurimi, kur pjesa më e madhe e buxhetit të tregut të sigurimeve krijohet nga sigurimet e detyrueshme?! Nga 8.1 miliardë lekë që ishte tregu deri në fund të muajit qershor, 5.6 miliardë lekë janë krijuar nga sigurimi i detyrueshëm i mjeteve motorike.

E mira më e madhe e tyre do të ishte sikur sistemin Bonus-Malus ta zbatonin në formën Bonus jo, Malus po.

Shpetim Luku/Qeveria polake lë thatë turizmin shqiptar

 

Kur u mendua se sivjet Shqipëria do të kishte një sezon thuajse normal turistik ndodhin të papritura të pakëndshme që nuk e garantojnë këtë pritshmëri.

Kur menduam se e keqja u la pas, për rrjedhojë, edhe ndikimi i saj shkatërrimtar mbi turizmin, zhvillime të tjera na bëjnë të kuptojmë se jo cdo gjë varet nga ne.

Kur menduam se më në fund, turizmi shqiptar do të rikthehej, që këtë sezon në nivelet thuajse të parapandemisë duke se kjo është e pamundur të ndodhë. Një vendim i qeverisë polake, mbi bazën e të cilit, cdo shtetas polak që vjen me pushime në Shqipëri do të jetë i detyruar për një karantinë 10 ditore kur të kthehet në vendin e tij ka zbehur së tepërmi optimizmin e operatorëve turistikë shqiptarë. Dhe me të drejtë, pasi ata janë të qartë, që një kushtëzim i tillë do të ketë një efekt të madh frenues tek pushuesit polakë. Shumë të rrallë mund të jenë ata që mund ta pranojnë një kosto e sakrificë të tillë. Sipas asaj cfarë është konstatuar në sezonet e shkuara turistikë, turistët polakë që zgjedhin të pushojnë në resortet shqiptare përbëjnë rreth 60 për qind të totalit të turistëve të huaj. Në bazë të marrëveshjeve që kanë nënshkruar operatorët turistikë shqiptarë me tur operatorët polakë në Shqipëri duhet të vinin mesatarisht 30 cartera në jave. Mirëpo zhvillimet e fundit, nëpërmjet vendimit të qeverisë polake, bëjnë që gjërat të ndryshojnë. Të bindur mbi pasojat katastrofike që mund të ketë ky vendim i qeverisë polake në turizmin shqiptar, disa nga drejtuesit e resorteve turistikë më të njohur në vend, ata, që punojnë kryesisht me turistë të huaj, i kanë dërguar një letër kryeministrit Rama e ku kërkojnë angazhimin e tij për të zhbllokuar situatën absurde të krijuar. Natyrisht nëpërmjet komunikimit me qeverinë polake dhe informimin akoma më të saktë të tyre për realitetin pandemik shqiptar.

Shqipëria tashmë ka një situatë pandemike të tejkaluar. Numri i rasteve ditore është i papërfillshëm, cka tregon  arritjen e imunitetit të tufës, nëpërmjet kalimin të sëmundjes në mënyrë natyrore nga shumë qytetarë dhe ecuria e mirë e vaksinimit. Edhe nga vende të dnryshme të Bashkimit Europian Shqipëria është klasifikuar në vendet e sigurta sa i takon situatës së pandemisë.  Të gjithë, zyrtarë, qytetarë e biznesmenë të sektorit të turizmit ishin të bindur se do të kalonin një verë të qetë e normale. Mirëpo, ja që del një vendim i qeverisë polake që hedh në erë gjithcka. Që i detyron pronarët e resorteve turstike të drejtojnë sytë nga qielli, për të shpresuar në rregullimin e situatës, ndonëse ditët e sezonit kalojnë.

Të vetëdijshëm për efektet negative të këtij fakti, shqetësimit dhe lutjes së tyre i bashkohemi edhe ne.

 

Shpetim Luku/Kur Avni Ponari ëndërronte të bënte SIGAL-in, si GENERALI

Ndërsa shëtiste në rrugët e Milanos, nën shoqërinë e një miku, me të cilin kishte shkuar për të festuar Vitin e Ri 1999, Avni Ponari u gjend para zyrave impresionuese të kompanisë së sigurimeve Generali.

“E njeh, është Generali, kompani shumë e madhe sigurimesh”-i thotë miku shoqërues, Avni Ponarit, duke u përpjekur ta intrigojë, pasi vetëm 6 muaj më parë ai kishte marrë licencën për të krijuar një kompani private sigurimesh.

“E njoh, dhe jo vetëm e njoh, por kompania ime “SIGAL” pas 20 vitesh do të jetë si Generali”-i përgjigjet Avni Ponari. Tani që kanë kaluar pak më shumë se 20 vite “SIGAL Uniqa Group Austria” ka vërtet fizionominë e kompanisë Generali. Sepse, ashtu sikurse Generali është një nga kompanitë më të mëdha të tregut të sigurimeve në botë, Edhe “SIGAL Uniqa Group Austria” është kompania më e madhe e sigurimeve. Nëse Generali është një kompani e shpërndarë në afro 50 vende nëpër botë, SIGAL Uniqa Group Austria është një kompani që ka vite që ka marrë karakter rajonal duke u përhapur në Kosovë dhe Maqedoni, përvec Shqipërisë. Nëse Generali që kishte për referencë Avni Ponari këtu e 22 vite më parë, është një kompani me 70 miliardë euro prime në vitin 2020, edhe SIGAL, duke patur parasysh rajonin e vogël me konsumatorë të sigurimeve, ka një volum të konsiderueshëm primesh me mbi 65 milionë euro vitin e kaluar.

Rreth 72 mijë të punësuar ka Generali në të gjithë botën, por edhe SIGAL ka një numër të konsiderueshëm prej 1500 të punësuarish dhe agjentësh. Me pak fjalë, shifrat tregojnë që SIGAL UNIQA Group Austria është një General i rajonit tonë. Shifrat tregojnë se “përbetimi” i Avni Ponarit në rrugët e Milanos se “pas 20 vitesh edhe SIGAL do jetë një general shqiptar u bë realitet. Dhe tashmë duhet të kthehemi pas në kohë, të përfytyrojmë edhe një herë një person, i cili kishte vetëm pak muaj që i kishte hyrë rrugës së biznesit dhe që merrte si shembull një kompani të madhe ndërkombëtare. Cfarë ishte parashikimi i tij? Eufori e një personi që ishte i vetëdijshëm për licencën që kishte dhe biznesin ku kishte hyrë? Objektiv jo realist i një personi që oreksin e kishte më të madh se sa mundësia? Apo dicka tjetër? Vitet kaluan dhe tashmë ne kemi detyrimin dhe mundesinë ti japim përgjigjen e duhur pyetjes së mëparshme. E vërteta është se ajo cfarë shpalosi Avni Ponari përballë ndërtesës së kompanisë Generali ishte një ëndërr. Gjithkush ka nevojë për një ëndërr si pikë orientimi dhe më pas, edhe për një sistem drejtimi që do ta cojë personin në mbërritjen tek kjo pikë referimi. Bindja përcakton veprimin tënd dhe veprimi yt përcakton rezultatet e tua, por e para gjë është të kesh besim- thotë Mark Victor Hansen një motivues dhe trajner biznesi. Avni Ponari kishte shumë besim në vetëvete, një besim që e shpaloste kudo, e me siguri, në heshtje, shumë vetë mund ta kenë konsideruar edhe megaloman. Mirëpo duke qenë i përkushtuar non stop karshi kompanisë që krijoi, duke i përqëndruar vetëm tek ajo, duke ndërmarrë kurdoherë në kohën e duhur veprimet e duhura, duke i kushtuar shumë rëndësi reputacionit të kompanisë, duke paguar dëmet që i takonin të paguanin,  duke bërë përpjekjet e duhura për të rritur shkallën e edukimit të publikut për domosdoshmërinë e sigurimit, duke mos u kënaqur vetëm me të ardhurat e sigurimit të detyrueshëm, por duke përqëndruar vëmëndjen tek sigurimet vullnetare, ai ia ka dalë mbanë që të jetë lider i përhershëm i tregut të sigurimeve në Shqipëri, Kosovë dhe Maqedoni. Jo vetëm kaq, por ka por ka qenë dhe katalizatori kryesor zhvillues i këtij tregu. Sepse gjithmonë ka qenë një hap të tjerëve, dhe të tjerët thjesht më pas kanë ndjekur hapat e tij. Kështu ndodhi me themelimin e kompanisë së sigurimit të jetës, e cila është e para kompani e këtij lloji në Shqipëri dhe vetëm më pas tregut iu bashkëngjitën edhe operatorë të tjerë. Kështu ndodhi edhe kur SIGAL u zgjerua në Kosovë dhe Maqedoni nëpërmjet kompanive Sigal Kosova dhe Sigal Maqedonia dhe vetëm më pas, vepruan në të njëjtën mënyrë edhe kompanitë e tjera analoge shqiptare. Po kështu, Avni Ponari ishte i pari, që kuptoi në momentin e duhur nevojën e ofrimit të një investitori të huaj të rëndësishëm në tregun e sigurimeve, ndaj ofroi Uniqa Group Austria. Rrugën e tij e ndoqn më pas kompani të tjera shqiptare.

Sigal Uniqa Group Austria është e vetmja kompani shqiptare, që, edhe pse sistemi bonus malus nuk ka filluar akoma zbatimin, ajo e aplikon atë në një formë tjetër, duke i ofruar të siguruarit një sigurim gjysëm kasko me cmimin e policës së zakonshme TPL. Dhe nuk janë pak, por mbi 400 milionë lekë të vjetra, subvencioni vjetor, i përdorur për këtë qëllim.

Tani, tregu i sigurimeve  është përballë sfidave dhe zhvillimeve të reja. Sërish në pararojë të tyre është “Sigal Uniqa Group Austria”. Shumë zhvillime digitale janë bërë pjesë e zakonshme e veprimtarisë së SIGAL-it. Mund të raportosh dëmet online, mund të marrësh siguracionin online, është futur shërbimi i teleshëndetiti, cka do të thotë të kesh doktorin me vete. Shërbimet digitale janë e ardhmja edhe në biznesin e sigurimeve, ndaj, Avni Ponari, sikurse ka vepruar kurdoherë, edhe në këtë aspekt është i pari me shërbimin e digitalizuar.

Tregu shqiptar i sigurimeve ka edhe disa kompani të tjera, mirëpo Avni Ponari njihet si figura kryesore e tij. Sepse ai nuk lodhet, nuk përton të shfaqet kudo në publik kur është puna për të diskutuar për problematika të këtij sektori, për të punuar për zgjidhjen e tyre. Sfida e përhershme e tij ka qenë dhe mbetet: të funksionojë si një profesionist i mirëfilltë i sigurimeve dhe më shumë se kaq. Të jetë jo vetëm një njeri i suksesshëm, por edhe I vlerave.

SHPETIM LUKU/ Vjen makina e Di Caprios në Shqipëri

 

Karma Regero GT së shpejti në sallonin e “Classic Group”

 

Kushdo që ka dëshirë  të përjetojë dy ndjenja njëkohësisht, por të siguruara nga një makinë, sikurse është komoditeti i Porsche Panamera  me sportivitetin e Corvette  do ta ketë zgjidhjen. Kushdo person që dëshiron ti ngjajë legjendave të Hoollyvood-it, të paktën sa i takon makinës që ata përdorin, duke ecur në gjurmët e tyre, do ta ketë mundësinë. Kushdo që dëshiron të shijojë statusin e VIP-it, për aq sa ndikon lloji i makinës në përforcimin e kësaj ndjenje, do ta ketë të mundur ta bëjë këtë. Kushdo që do të përjetojë andrenalinën që të jep një makinë, e cila shpejtësinë 100 kilometra në orë e arrin në vetëm 3.9 sekonda do ta ketë të mundur në një të ardhme të afërt. Kushdo që dëshiron të ketë një makinë luksi, e cila të jep edhe kënaqësinë e makinës elektrike, por edhe të saj tradicionale, shumë shpejt mund ta realizojë këtë mundësi. Sepse në sallonet e “Classic Group” per pune ditesh do të “strehohet” në pritje të klientëve të saj, Karma Revero GT, makina ikonë e VIP-ave të Hollyvood-it, e prodhuar në Moreno  Valley, makina pas të cilës janë marrosur legjendat e tij dhe për të cilën ka investuar edhe aktori i famshëm Leonardo Di Caprio. Karma Revero GT e vitit 2020 është një makinë e klasës “Luxyru” cka do të thotë një segment më lart se sa klasat “S” dhe seria 7 dhe A8 apo Maserati dhe Porsche Panamera.  Karma Revero është  konkurente me Bentley, Bugatti,Rolls Royce, McLaren. Me marrjen e ekskluzivitetit te Karma Revero,  “Classic Group” sjell një risi në tregun shqiptar. Atë të ekskluzivitetit të një klase luksi automjetesh. Jo se në rrugët e Shqipërisë makina të tilla kanë munguar, porse ato janë siguruar në mënyrë spontane nga blerjet nëpër tregje të ndryshme ndërkombëtare, kurse tani bëhet fjalë që një makinë si Karma Revero të distribuohet në tregun shqiptar prej “Classic Group”. Për këtë kompani, të mirënjohur tashmë në sektorin e shitjes dhe servisit të automjeteve të reja, marrja e kësaj të drejte dhe përgjegjësie është një vlerësim i vecantë, pasi bëhet fjalë që për herë te parë, një operatori shqiptar ti besohet përfaqësimi për tërë territorin e Ballkanit. Deri tani Shqipëria është vendi i 7 që e ka marrë këtë përfaqësi pas Gjermanisë, Britanisë së Madhe, Francës, vendet Nordike, Benelux dhe Italisë.

Po cfarë është Karma Revero GT?  Ajo është një model hybrid me 135 kilometra pavarësi, mundësuar nga bateria dhe konvencional BMW me fuqi 536 kf dhe me gjatësi 5.07m.

Ndonëse Karma Revero Gt nuk është shqyrtuar nga institucione të tilla si IIHS ose NHTSA ai vjen me standarte të larta sigurie ku përfshihen një system kamerash në 360 gradë, monitorim i pikave të verbra, sensorë parkimi para dhe pas, paralajmërimpër përplasjen përpara dhe paralajmërim për largimin nga korsia si dhe një sërë pajisjesh të tjera.

 

Ajo që parashikohet ta bëjë konkuruese për tregun shqiptar, përvec cilësive të saj në krahasim me automjetet e tjera që janë aktualisht në të, si makinat e klasave “S”, seria 7 apo A8, është cmimi që mendohet që do të jetë edhe më i ulët se sa ai me të cilin shiten automjetet e tjera luksoze në Shqipëri.

Historia e Karma Revero fillon në vitin 2016, kur Karma Automotive debutoi me versionin e pare te hibridit ne versionin radikal sportiv. Në versionin e 2020 janë bërë ndryshime të rëndësishme, ndryshime këto që publiku shqiptar do të ketë mundësinë dhe kënaqësinë e konstatimit live në ambientet e distributorit të saj, “Classic Group”.

 

SHPETIM LUKU/Gentian Karaj merr edhe drejtimin e “Kosova Motor Company”

 

Gentian Karaj është drejtori i përgjithshëm i kompanisë së tregtimit të automjeteve të reja “Albanian Motor Company”. Që nga momenti i emërimit të tij në krye të kësaj kompanie ai ka mundur që ti japë një kthesë rrënjësore asaj. Nga një kompani thuajse modeste në tregues të shitjes së makinave dhe tregues ekonomiko-financiarë, tashmë “Albanian Motor Company” është kthyer në një nga kompanitë kryesore të këtij tregu, së bashku me 3-4 kompani të tjera. Dhe përderisa u bënë disa vite rrjesht që “Albanian Motor Company” performon shumë mirë në tregun shqiptar, atëhere është lehtësisht e kuptueshme se një meritë të madhe ka edhe mënyra e drejtimit, stili i drejtimit, mënyra e komunikimit etj. Edhe pronarët duken të kënaqur me treguesit dhe veprimtarinë e kompanisë ndër vite, përderisa kanë vendosur që Drejtorit të Përgjithshëm të kompanisë në Tranë ti shtojnë përgjegjësitë, ti shtojnë përmasat e menaxhimit, duke e bërë thuajse drejtor rajonal dhe duke e emëruar edhe në krye të “Kosova Motor”. Në dallim nga simotra e saj në Tiranë, kompania që tregton automjete të tipit Ford dhe Hyundai me seli në kryeqytetin kosovar nuk performon mirë. E mbylli vitin 2020 me pak më shumë se sa 100 makina të shitura dhe kjo i ka detyruar drejtuesit të bëjnë ndryshime në drejtim. Dhe duke qenë se në raste të tilla preferohen menaxherë të sprovuar, drejtues që kanë dhënë prova me rezultate konkrete se cfarë janë në gjendje të arrijnë, atëhere vëmëndja e tyre është drejtuar tek drejtuesi i kompanisë në Tiranë. “Do të marrësh edhe drejtimin e kompanisë në Kosovë”- i kanë thënë ata të besuarit dhe të vlerësuarit prej tyre, duke shpresuar në gjetjen e një mënyre ndryshe të drejtimit dhe menaxhimit, cka do të sjellë edhe përmirësimin e veprimtarisë së “Kosova Motor ”. Kjo kompani me performancën aktuale të kujton atë të “Albanian Motor Company” përpara disa viteve dhe ndoshta kjo dinamikë, kjo kthesë për mirë që ka marrë kompania me seli në Tiranë është edhe ajo cfarë shpresojnë të ndodhë edhe me kompaninë që vepron në territorin kosovar. Dhe nuk është se pronarët e kompanisë ushqejnë shpresa boshe. Pasi, Gentian Karaj ka dhënë prova që është një njeri i dedikuar në këtë lloj drejtimi dhe menaxhimi, te bazuar pikesepari ne disipline pune. Madje mund të futet tek edhe tek menaxherët pionierë të automjeteve të reja. Shumë kush mund të ketë krijuar sukses në biznes, shumë kush mund të ketë takuar suksesin në ushtrimin e një profesioni të caktuar, por Gentian Karaj dhe disa të tjerë kanë mundur të krijojnë suksesin në fushën e menaxhimit dhe drejtimit. Sikur në vitin 2002, ai ti thoshte jo një oferte për punë në këtë sektor, pra, atë të shitjes së automjeteve të reja, kushedi se cfarë statusi mund të kishte sot. Dhe ishte mëse e natyrshme të thoshte jo. Sepse oferta e gjeti me punë në Ministrinë e Brendshme, cka tregon se nëse ai do të gjykonte me të tjera kritere, duke patur prioritet qetësinë, rehatinë, rutinën, atëhere fare mirë mund ti përgjigjej negativisht propozimit. Mirëpo karakteristika kryesore e njerëzve të zotë është aftësia për të kapur trenin e radhës. Për të kapur mundësinë në momentin e duhur. Ndaj dhe Gentian Karaj e braktisi pa u menduar gjatë atë lloj statusi, që në sytë e shumë njerëzve duket privilegj, për tiu përkushtuar një profesioni të ri, sikurse është ai i menaxherit të shitjes së automjeteve të reja. Fillimisht me kompaninë “Classic” kur ajo tregtonte makinat e markës Volksëagen, ku së bashku me pjesën tjetër të stafit të saj arritën edhe shifra record shitjes që akoma nuk janë arritur nga ndonjë kompani tjetër shqiptare e kësaj fushe. Këtu e u përqëndrua dhe e kërkoi ai avancimin në karrierë, derisa në adresë të tij erdhi një propoim tjetër i rëndësishëm: ai i drejtorit të përgjithshëm të kompanisë “Albanian Motor Company”. Një drejtues dhe një menaxher gjykohet më së tepërmi nga produkti i tij i punës, nga ajo cfarë përmirëson në kompani dhe rezultatet e arritura nga kompania që tregton Ford-in dhe Hyundai-n në Tiranë janë shumë të mira. Që skanë asnjë lidhje me të kaluarën. Ndaj dhe Gentian Karaj u shpërblye edhe me emërimin tjetër edhe në krye të “Kosova Motor ”. Mbase nuk është cudi që në një të ardhme të afërt, të marrë nën drejtim edhe kompaninë që vepron në territorin maqedonas, duke marrë kështu përmasën reale të një drejtuesi dhe menaxheri rajonal.

 

 

Classic Tirana sjell në treg Suv-in elektrik me voluminoz Seres S3

 

 

Sektori i shitjes së automjeteve të reja në Shqipëri po përpiqet të ndjekë prirjet e tregut europian e atij boteror. Kështu, ndërsa është bërë tashmë e zakonshme për një qytetar të vendeve të reja që të blejë e përdor një makinë elekrike, ndërsa statistikat e shitjes së makinave në Europë të këtyre lloj makinave janë në rritje të vazhdueshme, ndërsa shumë vende kanë objektiva për të reduktuar dhe zëvëndësuar brenda një afati kohor të gjitha makinat me djegje të brendshme me ato elektrike, koncensionarët shqiptarë kanë vënë në dispozionin prej kohësh modele të ndryshme të makinave të këtij lloji. Së fundi është kompania e njohur e këtij tregu, “Classic Tirana”, ajo që i ofron klientëve një product të ri, nje alternative të re: SUV-in elektrik, Seres S3. Seres S 3 është një makinë me përmasa më të mëdha se sa SUV-ët e tjerë elektrik që ofrohen aktualisht në tregun shqiptar, si dhe ka nje pavarësi relativisht të mirë, duke arritur në 450 kilometra. Kjo do të thotë që me këtë tip makinë mund të shkohet pothuaj kudo në Shqipëri, pa patur ankthin e konsumit të baterisë. Dhe duke i shtuar këtu edhe përmasat e makinës, atëhere Seres S3 bëhet një alternativë shumë e mirë dhe shumë reale për konsumatorin shqiptar.

“Classic Tirana” është një kompani që gjithmonë ka ofruar risi për tregun shqiptar të shitjes së automjeteve të reja. Nuk mbarojnë përpjekjet e saj vetëm me sjelljen e SUV-it Seres S3, sepse në intervalin kohor, mars prill tregut shqiptar do ti ofrohet një SUV tjetër, S5, e cila për nga përmasat është sa  BMW X5 aktuale. Kjo do të thotë që në mënyrë graduale gama e automjeteve klasike po mbulohet dalë ngadalë me automjetet elektrike.

Numri i makinave elektrike të shitura gjatë vitit 2020 në tregun shqiptar nuk është i madh. Rreth 300 makina ose 0,5 për qind e totalit të makinave të reja të shitura, sipas te dhenave te DPSHTRR-se, nuk përbën ndonjë numur impresionues, por kjo është e lidhur me infrastrukturën e karikimit të tyre. Kompani të ndryshme si “Coca Cola” apo kompani taksish e kanë zgjidhur në mënyrë individuale këtë problem. Kurse për qytetarë të zakonshëm është akoma e vështirë disponimi i një makine të tillë, pikërisht prej mungesës së infrastrukturës. Por e sigurtë është që në momentin që kjo infrastrukturë do të bëhet efektive, atëhere edhe numri i konsumatorëve shqiptarë që do të përqafojnë trendin tashmë botëror do të rritet. Për arsyen e thjeshtë se makina elektrike eshtë mjedisi i mbrojtur. Është kursim.  Eshtë e  ardhmja.

SHPETIM LUKU/Mitsubishi, një surprizë e vërtetë në tregun shqiptar të automjeteve të reja

 

Mitsubishi, marka e mirënjohur japoneze e makinave, rezulton një surprizë e vërtetë për vitin 2020 në tregun shqiptar të automjeteve të reja. Jo sepse kjo markë u fut në këtë treg, gjatë vitit që shkoi, duke iu bashkangjitur markave të tjera që janë të pranishme në Shqipëri. Pasi në të vërtetë Mitsubishi ka vite që ka hyrë dhe është menaxhuar prej kompanisë “Ultra Motors”. Por jo në kuota të kënaqshme dhe jo me ndonjë rol protagonisti. Kurse gjatë vitit që sapo u mbyll, automjetet e markës Mitsubishi u shitën në një numur të tillë që përbën jo vetëm record për të, por e rendit markën Mitsubishi, ndër më të shiturat e vitit. Konkretisht janë shitur rreth 410 makina të kësaj marke. Dhe nëse nuk themi dot me siguri që është marka më e shitur në mënyrë absolute, për shkak të mungesës së të dhënave analitike të markave të tjera të automjeteve, ajo cfarë mund të pohojmë me bindje është se automjetet e markes Mitsubishi ngjiten në podin e fituesve të garës vitin e shkuar. Suksesi i arritur është impresionues, por gjithcka shpjegohet dhe bëhet më e qartë kur sjell ndërmend se tashmë marka Mitsubishi është kthyer në markë prioritare për grupin më të madh automotive në Shqipëri, “Classic Group”. Ky është një ndër subjektet e para që është marrë me tregtimin e automjeteve të reja në Shqipëri. Për një periudhë të gjate kohore ka distribuar dhe realizuar shërbimin e passhitjeve të makinave Volkswagen duke shënuar rezultate të shkëlqyera me këtë markë. Më pas në menaxhimin e “Classic”-ut u e bë i preferuari i tij marka Hyundai. Edhe pse makinat e njohur koreano-jugore kanë shumë vite prezencë ne tregun shqiptar, shkëlqimin e saj kjo markë e ka arritur me “Classic Group”, duke arritur të renditet ndër markat më të shitura. Ndërsa gjatë vitit 2020, energjitë menaxhuese dhe kujdesi kryesor i stafit të “Classic Classic Group” u përqëndruan tek Mitsubishi. Një markë kjo e mirënjohur, prezente në Shqipëri prej vitesh, por e lënë disi pas dore. Dhe si për të vërtetuar që stafi i “Classic Tirana” është i “prere” për këtë punë, pra për shitjen e makinave të reja, vjen edhe rezultati: afro 410 makina të shitura. Se c’përfaqëson një numur i tillë shitjesh del në pah po qe se i referohemi statistikave të publikuara nga Drejtoria e Përgjithshme e Transportit Rrugor, sipas të cilave, gjithsej në Shqipëri për vitin 2020 kanë hyre dhe janë regjistruar rreth 470 makina të markës Mitsubishi. Pra, praktikisht pjesën dërrmuese të tyre e ka sjellë “Classic Group”.

Viti 2020 ishte i pari vit kur vëmëndja e grupit kryesor automotive shqiptar u përqëndrua në një markë tjetër, nga ajo e viteve të shkuara. Dhe ky është edhe fillimi i shkrimit të një kapitulli të ri suksesi, duke patur parasysh me cfarë ka ndodhur me markat paraardhëse të trajtuara nga ky grup.

“Classic” është një prej grupeve më të mëdha automotive në Shqipëri. Për nga mënyra e organizimit dhe e funksionimit, “Classic Group” është ndoshta unik në tregun e shitjes së automjeteve të reja. Edhe kompanitë e tjera bazohen në shitje dhe servis e pjesë këmbimi. Por e vecanta e “Classic”-ut, krahasuar me to është se ka një veprimtari më të gjërë, një veprimtari që përfshin edhe ekskluzivitete dhe shitje të aksesorëve të tillë sikurse janë vajrat lubrifikantë të markës ELF dhe Castrol, ARAN dhe BP, i gomave të markës Continental, i veglave të punës Beta etj. Dhe këtë aktivitet e zhvillon nëpërmjet kompanive të tjera, që janë gjithashtu pjesë përbërëse e grupit, si kompania AUTO EXPRES, Classic L, Classic Aksesoires, Ultra Motors etj. E për ta mbyllur fare ciklin është edhe kompania e dhënies së makinave me qera SIXT.

Kemi të bëjmë me një grup automotive, i cili që nga casti kur është krijuar në vazhdim ka qenë një nga protagonistët kryesorë të këtij tregu. Ndryshe pra nga kompanitë e tjera, që kanë patur luhatje në kohë të ndryshme, që e kanë patur aktivitetin e tyre me ulje e ngritje, që kanë përjetuar ditë të mira e të këqia, “Classic Group” i ngjan një atleti  që e ka nisur garën duke qenë në radhën e parë të garuesve, e mbaron atë në fund të vitit duke qenë sërish në radhën e parë, për të vazhduar garën e vitit të ardhshëm në të njëjtin pozicion.

Dizejnatori i turizmit

 

SHPETIM LUKU/

Janë të shumë shqiptarët që kanë shkuar në Turqi për pushime gjatë këtyre viteve. Në Antalia, në Alania apo në Kemer, kudo ku kanë shkuar  janë impresionuar prej madhështisë së resorteve turistikë dhe kushteve të pushimit që ofronin, duke u kthyer me përshtypjet më të mira. Por shumë pak prej tyre mund të jenë përfshirë nga meditimi dhe dëshira për të parë të tilla edhe në Shqipëri. Kurse njëri prej pushuesve të viteve të shkuara, Fatos Cerenishti sa herë shkonte në Turqi në këto lloj resortesh për pushime kthehej prej andej i frymëzuar. Kthehej nga Turqia me dëshirën për të qenë sfidues. Ai nuk e pranonte dot në logjikën e tij që dicka që kishte figuruar e suksesshme në Turqi, të mos të ndërtohej në Shqipëri. Sepse kushtet kryesore që e bënin të arsyeshme një biznes dhe investim të tillë egzistonin. Bregdeti i mirë i Durrësit dhe Kavajës, dielli me tepri dhe bujari, qytetet afër, natyra e bukur etj. Ndaj dhe ishte i fiksuar e i perbetuar për të bërë dicka analoge me  resortet luksoze turke. Sigurisht që e dinte që resortin mund ta ndërtonte, por mund të kishte vështirësi në cilësinë e shërbimit të ofruar, por cdo gjë e ka një pikënisje. Dhe gjërat përmirësohen rrugës. Duke shfrytëzuar background-in e tij si biznesmen ndërtimi, ai nuk e bëri të gjatë, por ndërtoi një kompleks turistik në Qerret të Kavajës ose sic njihet tani Fafa-n e vogël me rreth 200 dhoma gjithsej. Kurse ambicien e tij e plotësoi përfundimisht, kur në Golem bëri të mundur ngritjen e një resorti gjigand, më të madhin tani për tani në Shqipëri: “ Grand Blue Fafa”-n. Një resort ky me mbi 600 dhoma e që ka pak më shumë se tre sezone që operon në mënyrë shumë të suksesshme. Sezonin e kaluar, të dy resortet Fafa funksionuan në kapacitetin e tyre të plotë. Turistë të ndryshëm nga vende të huaja, polakë, cekë, suedezë shijuan kushtet shumë të mira të ofruara nga ky resort dhe u larguan prej tij mjaft të kënaqur. I kënaqur duhet të ndihet edhe Fatos Cerenishti. Jo më tepër për ecurinë e biznesit të tij konform apo përtej pritshmërive. Por sepse duke investuar në turizëm  ai ka ndërtuar një standart, ka përhapur një “modë” investimi, e cila është ndjekur nga të tjerët. Në bregdetin e Durrësit, por sidomos në zonën e Qerretit janë shtuar së tepërmi investimet në trajtën e ndërtimit të strukturave hoteliere apo resorteve cilësore dhe përvec sipërmarrësve që i kanë realizuar ato, një meritë e madhe shkon edhe për Fatos Cerenishtin. Sepse duke qenë pionier i këtyre lloj investimeve, ai fare mirë mund të quhet ndërkohë edhe arkitekti apo dizajnuesi i tablosë turistike të bregdetit të Durrësit dhe Kavajës. Fare mire mund te quhet edhe si biznesmeni qe solli pushimet e Turqise ne Shqiperi. Biznesmenët shqiptarë kanë manifestuar gjatë 3 dekadave të ushtrimit të iniciativës së lirë që kanë shumë guxim dhe shumë dëshirë për imitim. Ndaj, në rastin konkret, kjo prirje e kjo mani e tyre ka patur një rezultat pozitiv. Dhe Fatosi nepermjet menyres se veprimit dhe logjikes se investimit ka sherbyer si nje katalizator zhvillimesh te mirepritura ne sektorin me me perspektive te ekonomise e qe mbart potencialin  me te madh, turizmit shqiptar.

Gjatë vitit 2019 Shqipëria, sidomos zona e Durrësit u goditën nga një tërmet i fuqishëm me efekte shkatërruese. Qindra familje humben shtëpitë e tyre, ngaqë ato ku banonin më parë ose u shkatërruan ose u bënë të pabanueshme. Por këto familje nuk mbetën të pastreha. Sepse, si një biznesmen tepër social, si një njeri mjaft sensibël në raport me nevojat e njerëzve në situatë të vështirë, Fatos Cerenishti hapi dyert e komplekseve të tij, duke strehuar në të mbi 500 familje.  Dhe jo për pak ditë, por për plot dy muaj. Dhe sikurse veprohet zakonshëm në situata të tilla, ku kërkohet solidaritet me të dëmtuarit e njerëzit që halli u ka trokitur në derë, shembullin e tij e ndoqën edhe mjaft hotele të tjera. Duke bërë kështu që situara traumatike të kalojë më lehtë.

Fatos Cerenishti është një person që nuk kënaqet asnjëherë me atë që ka arritur. Gjithmonë do të përcaktojë sfida të reja. Gjithmonë e gjen duke punuar për to. Dhe kjo është plotësisht e kuptueshme. Duke qenë se bashkëpunëtorë të tij të biznesit janë tur operatorë të njohur ndërkombëtarë, janë pikërisht këta të fundit ato që ndihmojnë në përmirësimin e vazhdueshëm të resorteve Fafa. Dhe fakti që turistët e huaj sa vijnë e shtohen tek këto resorte, fakti se sezoni turistik përpara fillimit të pandemisë po mbërrinte në 5 muaj, do të thotë se detyrat e tyre zbatohen me sukses. Kjo është edhe arsyeja kryesore pse resortet Fafa kanë zhvilluar sezone shumë të suksesshëm turistikë dhe ku sezoni pasardhës është gjithmonë më i mirë se sa ai paraardhësi.

Tani që resortet e Fafa-s, “Grand Blue Fafa” dhe “Fafa” kanë krijuar fizionominë e tyre, burimet e tyre të furnizimit me turistë të huaj, kanë arritur një nivel të lartë shërbimi, mundësuar nga mbi 500 punonjësit e tyre, përpara Fatos Cerenishtit është shfaqur një preokupim tjetër. I vetëdijshëm se një kompleks i mirë dhe i bukur stonon kur është i rrethuar nga ndërtime demode, i bindur se suksesi nuk kërkon vetëm resort të bukur, por edhe zonë të bukur, ai ka filluar nga puna për “korigjimet” e duhura. Kompleksit Fafa në Qerret të Kavajës i shtoi edhe një hotel tjetër tejet cilësor me afro 60 dhoma, duke arritur kështu në një kapacitet total prej 850 dhoma. Dhe nëse këtë kapacitet e shton edhe në të ardhmen, kjo nuk është qëllim në vetëvete i tij për sa më shumë kapacitete hoteliere, por thjesht përpjekje për të përmirësuar sa të jetë e mundur zonat përreth hoteleve të tij. E vërteta është se tashmë edhe hotelet e tjerë në bregdetin e Durrësit dhe të Kavajës janë të standarteve më të larta bashkëkohore, të bukura e me projekte të shkëlqyera, por kjo nuk do të thotë se e kaluara anarkiste nuk ka lënë gjurmë që duhet eleminuar. Dhe ky është qëllimi kryesor i Fatos Cerenishtit dhe investitorëve të tjerë të sektorit turistik.

 

Gentian Karaj, Drejtor i Pergjithshem i kompanise “Albanian Motor Company”

SHPETIM LUKU/

Kompania e tregtimit të makinave, “Albanian Motor Company”, e cila prej 15 vitesh merret me shitjen dhe servisin e Fordit në Shqipëri, e mbylli vitin 2019 me një rezultat fantastik. Arriti në nivelin e afro 12 milionë eurove xhiro biznesi, cka shënon një rezultat historik për kompaninë. Nuk është niveli më i lartë absolut i siguruar gjatë vitit 2019 në sektorin automotive sepse janë dy kompani të tjera që kanë nivel më të lartë xhiroje. Mirëpo këto kompani kanë objekt të shitjes së tyre makina premium, cmimi i të cilave është i lartë. Ndaj, për nga numri i makinave të shitura, duket se performancën më të mirë e ka patur “Albanian Motor Company”. Përgjatë vitit të shkuar ishin 589 makina të markës Ford që iu shtuan flotës së kompanive të ndryshme, publike apo private apo edhe individëve të ndryshëm. Në këtë mënyrë, kompania shqiptare që tregton Fordin në Shqipëri vazhdon me performancat e mira vjetore të saj, vazhdon me protagonizmin e spikatur të saj, duke arritur të renditet për një kohë të gjatë ndër kompanitë kryesore të tregut automotive në Shqipëri. Dhe kjo eshte merite e te gjithe stafit te saj, nen udheheqjen e Drejtorit te Pergjithshem te saj, Gentian Karaj, te cilet, me rezultatet e arritura ne vazhdimesi i kane dhene “Albanian Motor Company” statusin e nje prej operatoreve kryesore ne tregtimin dhe servisin e makinave te reja.

Ndërkohë që vitin 2020 e filloi sërish me një eveniment të rëndësishëm për të. Sepse, tashmë, krahas Fordit dhe Ssang Yong-ut, kjo kompani ka fituar të drejtën të “kujdeset” edhe për markën Hyundai. Kjo e bën  “Albanian Motor Company”, tashmë një kompani, së cilës i forcohet akoma më shumë perspektiva dhe protagonizmi në tregun e shitjes së makinave të reja. Jo se ajo nuk ka qene e tillë përgjatë 15 viteve, përkundrazi, nëpërmjet një pune këmbëngulëse të stafit të saj marka Ford ka qenë ndër më të shiturat në tregun shqiptar. Por duke i bashkëngjitur veprimtarisë së saj edhe një marke te  njohur, sikurse eshtë Hyundai, shanset janë që “Albanian Motor Company” të ngjitet në majë të tregut automotive në Shqipëri.

Për hir të së vërtetës, Hyundai nuk është një markë e panjohur në Shqipëri, që po hyn dhe po fillon tregtohet për herë të parë në Shqipëri.  Ajo e ka një histori në tregun shqiptar dhe natyrisht është një histori suksesi nën menaxhimin e kompanisë tjetër të spikatur të këtij tregu, “Hyundai Auto Albania”. Mirëpo, suprizat nuk kanë munguar asnjëherë në këtë lloj tregu, pasi ai ka qenë në proces të vazhdueshëm ndryshimi dhe ristrukturimi. Psh Mercedes Benz, dikur menaxhohej nga “Auto Star Albania” në pronësi të biznesmenit Basri Rruka, ndërsa tani është pronë e Kastrati Group. Marka e mirënjohur japoneze dikur tregtohej nga Toyota Tirana, kurse tani nga një kompani tjetër. Marka e mirënjohur italiane, Fiat, dikur ishte nën menaxhimin e kompanisë Anas, në pronësi të biznesmenit Ferdinand Ibrahimi, por kjo përfaqësi iu hoq për mungesë rezultatesh dhe iu dha një kompani tjetër shqiptare. Fat të njëjtë pati edhe BMW, e cila kalo nën pronësinë e një grupi kroat dhe tashmë do të tregtohet prej kompanisë TAG Albania. Iu referohemi këtyr rasteve e ndodhive në tregun e shitjes së automjeteve të reja për të treguar që biznesi i këtij sektori është i vështirë. Është një biznes që ka problematika të shumta, një biznes që nuk garanton qëndrueshmëri afatgjatë. Ndaj, “Albanian Motor Company” dhe stafi i saj, me në krye drejtorin e përgjithshëm, Gentian Karaj, meritojnë fjalët më të mira, komplimente të pakursyera pse kanë arritur ta mbajnë kompaninë në 3-4 kompanitë kryesore të sektorit për një kohë kaq të gjatë.

Në përgjithësi, ndryshimet kanë ardhur si rrjedhojë e menaxhimit të dobët dhe e pakënaqësisë së kompanive mëma që kanë dhënë përfaqësinë, kundrejt partnerëve të tyre në Shqipëri. Përjashtim bën vetëm Hyundai, e cila, në tregun shqiptar ka qenë një histori suksesi për ato vite që ishte nën “juridiksionin” e “Hyundai Auto Albania”. Në këtë kuptim, për “Albanian Motor Company”, marrja edhe e Hyundai-t është një gjë pozitive, jo vetëm prej reputacionit të brandit, por edhe si trashëgim i një emri të mirë që ka krijuar kjo markë në tregun shqiptar përgjatë shumë viteve. Duke qenë edhe distributor dhe ofruese e shërbimit të servisit për markën Hyundai në Shqipëri, “Albania Motor Company” synon mbase të dyfishojë aktivitetin e saj dhe kjo si rezultat i performances që ka patur ndër vite Hyundai.

 

 

Nga tezgat e peshkut tek anijet dhe fabrikat “Coral Fish”, rruga e ndjekur nga Helidoni

SHPETIM LUKU/

Sikur Helidon Rruga do të dekurajohej nga ato cfarë flisnin nën zë bashkëqytetarë të tij kavajas, kur ai, vetëm 15 vjecar, vendosi një tezgë në qendër të qytetit, ai nuk do të ishte kurrë ai që është sot. Sikur Helidon Rruga  të vihej në sedër  nga ajo që i thoshte përditë babai i tij, Skënderi, kur ai në vitin 1992 iu fut rrugës së konkretizimit të inisiativës së lirë, ai kurrë nuk do të mbërrinte në këtë “stacion” ku ndodhet sot. Sikur Helidoni të dorëzohej përpara qortimeve të babait, sikur ai të ndiqte sugjerimet e tij për karrierën dhe “rregullimin” afatgjatë është e sigurtë që ai do të kishte ngatërruar “korsinë”, duke ikur në “drejtim tjetër”. Ndërkohë që instikti e shtynte drejt kësaj rruge që ka përshkuar për afro 28 vite. Por edhe po të thyhej përballë këshillave të të atit apo vërejtjeve të tij, sërish kjo nuk do të ishte dicka e cuditshme. Duke qenë bir i një figure të nderuar të Kavajës, djalë i një mësuesi dhe drejtori të shkollave të ndryshme të Kavajës ti nënshtrohej autoritetit të prindit nuk ishte herezi. Përkundrazi, ishte më normalja që mund të ndodhte. Sepse Skënder Rruga nuk mund të dilte jashtë botëkuptimit të tij prej një intelektuali të kohës, i cili perspektivën e mirë të fëmijëve të tij e konceptonte nëpërmjet përfundimit të studimeve në universitet, fillimin e punës atje ku kërkon atdheu etj. Mirëpo nuk mendonte kështu djali i tij. Instikti dhe “konkluzionet” që kishte nxjerrë Helidon Rruga, duke shqyrtuar ndryshimet e mëdha historike që po ndodhnin në Shqipëri nuk ia sugjeronin kete. Ikjet e shumta të njerëzve në emigracion, papunësia e madhe si rrjedhojë dështimit të sistemit të mëparshëm ekonomik, mbylljet e fabrikave te shumta në Kavajë dhe gjithë Shqipërinë, braktisjet e universitetit etj kishin bërë të kuptonte në mënyrë intuitive që një kohë tjetër ka ardhur. Një kohë, kur përgjegjës për mirëqënien tënde është vetë individi. Dhe duke vazhduar me “kokëfortësi” dhe me risi në rrugën e tregut, Helidon Rruga filloi të ngjisë në mënyrë të njëpasnjëshme shkallët e suksesit. Filloi të rritej, filloi të përmirësojë aktivitetin në mënyrë kreative, për të arritur në aktualitetin e sotëm, kur ai disponon dy fabrika të përpunimit të peshkut, ferma të rritjes së peshkut, anije për zënien e peshkut, restorante të konsumit të peshkut, dyqane të tregtimit të peshkut etj. Pra një aktivitet të specializuar e të plotësuar në të gjitha hallkat e tij. Dhe nuk është vetëm fizionomia e veprimtarisë ajo që e dallon atë nga të tjerët, por mbi të gjitha janë treguesit që arrin kompania cdo vit, është performanca që ajo manifeston cdo vit, cka  e bën kompaninë lider në sektorin ku operon. Kur iu referuam vjet performancës së kësaj kompanie, thamë që ai ishte viti më i mirë i kompanisë. Mirëpo, ja edhe në vitin 2019  sërish, “Coral Fish” arriti që të përmirësojë  performancën, duke i avancuar më tej treguesit, krahasuar me një vit më parë.

Kjo performancë është e konkretizuar të paktën në 2 tregues domethënës për veprimtarinë e një kompanie.

Së pari, në xhiron e realizuar. Ajo që u shënua gjatë vitit 2019, ishte xhiro më e madhe e realizuar ndonjëherë nga kjo kompani. Një volum prej rreth 2.4 miliardë leësh, ose afro 19 milionë euro nuk është arritur asnjehere  prej saj dhe i krahasuar me vitin paraardhës, rritja ishte rreth 12 për qind. “Coral Fish” u rendit në vendin e 131 midis kompanive më të mëdha shqiptare.

Së dyti është treguesi i eksportit. Edhe ky tregues është në nivelin më të mirë absolut përgjatë gjithë viteve veprimtari të “Coral Fish”-it. Gjatë vitit 2019, kompania realizoi një eksport në nivelin e 1.35 miliardë lekëve ose 11 milionë eurove. Po qe se bëjmë një raport mes sasisë së eksportuar dhe asaj të ofruar për tregun e brendshëm, raporti është 60 me 40 për qind. Pra 60 për qind e totalit të aktivitetit të “Coral Fish”-it përbëhet nga eksporti. Mbi 1000 ton peshk i përpunuar është dërguar në tregjet e Italisë dhe Spanjës e kjo konsiderohet një arritje e madhe për kompaninë.

“Coral Fish” operon në sektorin e përpunimit të produkteve të detit që nga viti 1994. Prej shumë vitesh, kjo kompani operon edhe në tregjet ndërkombëtare, marrëdhëniet me të cilën janë intensifikuar së tepërmi vitet e fundit. Produktet e ofruara nga “Coral Fish” janë produkte me origjinë nga vendi dhe importi. Gama e gjërë e produkteve përfshin produkte të freskëta dhe të ngrira duke kënaqur kështu nevojat e një numri të madh konsumatorësh. Që prej themelimit janë bërë përmirësime progresive persa i takon zgjerimit të hapësirave të aktivitetit dhe përshtatjes së normave të punës dhe cilësisë së produkteve me të gjitha standartet e BE-së. Një përparësi të madhe biznesit i jep vendndodhja e stabilimentit pranë portit të peshkimit. Për më tepër, zotërimi i anijeve të peshkimit i jep mundësi “Coral Fish” për peshkim në detin Adriatik dhe Jon duke garantuar kështu një itenerar të shkurtër nga moment i peshkimit deri në fazën e përpunimit dhe të ruajtjes.

Stabilimenti i ri me një imazh bashkëkohor është inaguruar në vititn 2008. Sipërfaqja e zhvillimit të aktivitetit është 6000 m2, ndërsa baza ftohëse zë një hapësirë prej 5000 m3. Teknologjia e përdorur është mjaft bashkëkohore, gjë që i krijon kompanisë një avantazh konkurues.

Helidon Rruga ka në background-in e tij 28 vite përvojë në biznes, kurse “Coral Fish” rreth 26 vite. Dhe meqënëse tregimin e nisëm me disa hipoteza dhe supozime rreth fatit të Helidon Rrugisë, a do të arrinte vallë ai të bëhej një personazh i rëndësishëm i biznesit shqiptar, një person, veprimtaria e të cilit e bën të dobishëm atë për komunitetin durrsak dhe atë kavajas, nepermjet punesimit te qindra grave dhe vajzave ku ushtron veprimtarinë, po qe se do të thyhej përballë opinionit të atëhershëm?!